Lënda ka për qëllim të ofrojë një kuptim të thellë të mekanizmave dhe funksioneve të sigurimeve në ekonomi. Studentët do të mësojnë rreth llojeve të ndryshme të sigurimeve, riskut dhe rolit të sigurimeve në menaxhimin e risqeve dhe mbrojtjen financiare. Gjatë këtij kursi studentët do të njihen me konceptet kryesore të riskut dhe do të studiohet roli i sigurimeve si mënyra e tranferimit të riskut. Do të trajtohen llojet e ndryshme të sigurimeve, kontratat e sigurimeve, trajtimi dhe analiza financiare e kompanive siguruese, situata e sigurimeve në Shqipëri me raste studimore dhe me të ftuar të fushës. Studentët do të aftësohen duke njohur konceptet themelore të sigurimeve dhe tregun e sigurimeve, duke ju dhënë mundësi që të shohin karierën e tyre si agjentë sigurues, në fushën e aktuaristikës ose duke dhënë kontributin e tyre professional në kompanitë siguruese.

Objektivat e lëndës përfshijnë zhvillimin e njohurive themelore mbi konceptet dhe praktikat e sigurimeve, ku studentët do të mësojnë rreth llojeve të ndryshme të sigurimeve, funksionit të tregut të sigurimeve dhe rolit të tij në ekonomi. Gjithashtu, lënda synon të ndihmojë studentët të kuptojnë të drejtat dhe përgjegjësitë e agjentëve të sigurimeve dhe konsumatorëve, si dhe të zhvillojnë aftësi analitike për të vlerësuar politikat e sigurimit dhe pasojat e tyre në jetën e përditshme dhe në kontekstin ekonomik më të gjerë. Në fund, studentët do të jenë të përgatitur për të analizuar tendencat dhe sfidat e ardhshme në industrinë e sigurimeve. Në fund të lëndës studentët do të jenë në gjendje të: • të njohin dhe kuptojnë konceptet themelore të sigurimeve dhe rëndësinë e tyre në menaxhimin e rrezikut. • të analizojnë strukturën dhe funksionimin e tregut të sigurimeve, duke përfshirë agjentët, kompanitë e sigurimeve dhe konsumatorët. • të njihen me legjislacionin dhe rregulloret që rregullojnë tregun e sigurimeve në Shqipëri dhe në nivel ndërkombëtar. • të analizojnë tendencat e reja dhe sfidat që do të ndikojnë tregun e sigurimeve në të ardhmen, përfshirë teknologjinë dhe inovacionin. • të zhvillojnë aftësi analitike për të vlerësuar ofertat e sigurimeve dhe për të bërë zgjedhje të informuara si konsumatorë.