Lenda “E Drejtë e Punës dhe Sigurimeve Shoqërore I” trajton rregullimin e marrëdhënieve të punës midis subjekte të së drejtës së punës, duke u bazuar tek aktet juridike në fuqi. Lënda paraqet fillimisht evoluimin historik dhe raportet me degët e tjera të së drejtës. Analizohen objekti, subjektet, institutet dhe institucionet e të drejtës së punës. Rëndësi paraqet edhe veprimi i të drejtës së punës në kohë dhe hapësirë, si dhe përcaktimi i kritereve ligjore e profesionale të punësimit. Kontrata individuale, fillimi, ndryshimi dhe përfundimi i marrëdhënies së punës trajtohen dhe përbëjnë një rëndësi të veçantë jo vetëm për punëmarrësit, por edhe më gjerë. Paga, pushimet, kushtet e punës, sindikatat, e drejta e grevës, dhe mjetet për zgjidhjen e marrëdhënies së punës, kanë rëndësi shumë të madhe në lindjen, zhvillimin dhe përfundimin e marrëdhënieve të punës, etj.

Objektivat e studimit të lëndës “E drejtë e Punës dhe Sigurimeve Shoqërore I”, lidhur me studentët janë: 1) Të njohin, shpjegojnë dhe analizojnë konceptet, burimet, historikun, dhe zhvillimet e reja rreth të drejtës së punës. 2) Të mësojnë si zhvillohen dhe mbrohen marrëdhëniet juridike të punës në një shtet demokratik, të së drejtës, dhe ekonomisë së tregut të lirë. 3) Të kuptojnë elementët e marrëdhënies juridike të punës, kontratën individuale dhe kolektive të punës. 4) Të përvetësojnë të drejtat dhe detyrimet që i takojnë në marrëdhënien juridike të punës, dhe të njohin elementët juridikë që lindin nga kjo marrëdhënie. 5) Të zotërojnë njohuritë rreth institucioneve që ndihmojnë në zgjidhjen e mosmarrëveshjeve që lidhen me të drejtën e punës. 6) Përvetësimi i të lëndës “E drejtë e Punës dhe Sigurimeve Shoqërore I” i ndihmon studentët që të jenë njohës dhe jurist të aftë në të ardhmen, ku të mund të kontribuojnë dhe të punojnë për zhvillimin e mëtejshëm të kësaj lënde jo vetëm në aspektin teorik, por edhe në interpretimin dhe zbatimin e saj praktik, në zgjidhjen me sukses të problemeve të ndryshme shumëdimensionale që mund të lindin në këtë fushë të së drejtës.